Mae Ruth Atherton yn hanesydd cymdeithasol, crefyddol a diwylliannol Ewrop fodern gynnar. Mae ei diddordebau ymchwil yn canolbwyntio ar ffurfio hunaniaeth gyffesol a natur pechod ac iachawdwriaeth yn yr Almaen yn yr unfed ganrif ar bymtheg a’r ail ganrif ar bymtheg, yn enwedig o ran datblygiad addysg sacramentaidd fodern gynnar. Mae hi'n aelod o'r Gymdeithas Hanes Eglwysig.
Mae Andy Croll yn datblygu diddordebau ymchwil yn hanes twristiaeth (yn enwedig twristiaeth arfordirol) yn y bedwaredd ganrif ar bymtheg hir. Mae ganddo ddiddordeb hefyd yn hanes tlodi a lles yng nghyfnod Deddf Newydd y Tlodion.
Mae Jonathan Durrant yn hanesydd rhywedd yn yr unfed ganrif ar bymtheg a'r ail ganrif ar bymtheg. Mae ei ddiddordeb ymchwil cyfredol ym mhrofiadau dewiniaeth yn Lloegr a'r Almaen yn y cyfnod modern cynnar. Dr Durrant sy'n golygu'r Witchcraft Bibliography Online sydd wedi ennill clod rhyngwladol.
Mae Chris Evans yn gweithio ar hanes diwydiannol o'r ail ganrif ar bymtheg i'r bedwaredd ganrif ar bymtheg a hanes caethwasiaeth yr Iwerydd yn oes y diddymu.
Mae ymchwil Dr Tim Galsworthy yn canolbwyntio ar gofio Rhyfel Cartref America a'r Blaid Weriniaethol yn y cyfnod hawliau sifil. Cyhoeddwyd ei erthygl gyntaf mewn cyfnodolyn – “Carpetbaggers, Confederates, and Richard Nixon” – gan Presidential Studies Quarterly yn 2022. Mae ganddo hefyd bennod ar y gweill yn dadansoddi perthynas y Blaid Weriniaethol fodern â’r Achos Coll. Mae Tim yn gorffen ei dymor o ddwy flynedd fel aelod o Gyngor Graddedigion Cymdeithas Hanes y De, ar ôl gwasanaethu fel Ysgrifennydd Ôl-raddedig HOTCUS (Haneswyr yr Unol Daleithiau yn yr Ugeinfed Ganrif) a Chadeirydd y blog ôl-raddedig Pubs and Publications. Mae wedi ysgrifennu ar gyfer adran “Made by History” y Washington Post, Muster gan y Journal of the Civil War Era, ac mae'n cyflenwi sylwadau arbenigol yn rheolaidd ar gyfer gwahanol allfeydd.
Mae Madeleine Gray, Athro Emeritus, yn hanesydd canoloesol sydd â chysylltiadau agos â nifer o sefydliadau treftadaeth a chymunedol ac mae’n gymrawd ymchwil anrhydeddus Amgueddfa Cymru. Mae hi wedi cyhoeddi’n helaeth ar hanes y canol oesoedd hwyr a’r cyfnod modern cynnar gyda ffocws arbennig ar dystiolaeth weledol o hanes credoau ac arferion crefyddol.
Mae gan Christopher Hill ddiddordebau ymchwil yn hanes modern Prydain a byd-eang, gyda ffocws ar hanes y cyfryngau, imperialaeth niwclear a mudiadau cymdeithasol. Ar hyn o bryd mae Chris yn ymgymryd â phrosiect a ariennir gan yr AHRC ar yr hyn a alwodd arweinydd Ghana, Kwame Nkrumah, yn ‘imperialaeth niwclear newydd’ – hyrwyddo rhaglenni niwclear Prydain a Ffrainc trwy gysylltiadau ac adnoddau trefedigaethol.
Prif ddiddordeb ymchwil Rachel Lock-Lewis yw hanes ffeministiaeth ym Mhrydain ar ôl y rhyfel ac mae hi ar hyn o bryd yn ymchwilio i Fudiad Rhyddid y Merched yn Ne Cymru. Mae ei chyhoeddiadau blaenorol wedi canolbwyntio ar rhywedd a newid cymdeithasol ym Mhrydain ar ôl y rhyfel, yn enwedig mewn perthynas â rhywioldeb, priodas, mamolaeth, rhianta a phlentyndod, a pherthynas. Mae Rachel yn gyd-gyfarwyddwr y Ganolfan Astudiaethau Rhywedd yng Nghymru.
